Komuna e Kamenicës njofton qytetarët se është përzgjedhur për të përfituar nga iniciativa WiFi4WB, e cila mundëson internet falas në lokacione të ndryshme publike.
Pas një procesi aplikimi, përfaqësuesit e kësaj iniciative kanë njoftuar përmes e-mailit se Kamenica është përzgjedhur si përfitues i projektit, i cili financohet bashkërisht nga Bashkimi Evropian dhe Qeveria e Republikës Federale të Gjermanisë, përmes programit EU4Digital.
Në njoftimin zyrtar thuhet:
“Kemi kënaqësinë t’ju njoftojmë se komuna juaj është përzgjedhur si përfitues i iniciativës WiFi4WB, e cila financohet bashkërisht nga Bashkimi Evropian dhe Qeveria e Republikës Federale të Gjermanisë, përmes projektit EU4Digital.”
Sipas informatave të pranuara, operatori i internetit i përzgjedhur për zbatimin e kësaj iniciative është Vala – Telekomi i Kosovës. Pas pranimit të të dhënave nga Komuna e Kamenicës, përfaqësuesit e Telekomit të Kosovës do të kryejnë vlerësimin teknik në terren të lokacioneve të propozuara për vendosjen e pikave të internetit falas.
Komuna e Kamenicës do të vazhdojë të mbështesë çdo iniciativë që rrit cilësinë e jetës së qytetarëve dhe qasjen e tyre në shërbime digjitale.
