Fëmijë të veshur bukur e me buzëqeshje në fytyrat e tyre, së bashku me stafin e këtij institucioni kanë shënuar 44-vjetorin me aktivitete nga më të ndryshmet.
Të përgatitur si duhet ata pëshpërisnin me zë të ulët se sot ka ditëlindjen shkolla e tyre, sepse kështu e njihnin ata këtë institucion, si një shkollë që në të janë duke marr hapat e parë dhe më të rëndësishmit të dijes.
Stafi i IP “Filizave” mirëpret çdo ditë fëmijët nga moshat e hershme e deri në moshën 5-vjeçare, dhe kujdeset që këta fëmijë të zhvillojnë dijen duke filluar nga gjërat elementare, që më vonë të jenë të përgatitur për etapat tjera shkollore.
E në festimin e këtij përvjetori të pranishëm ishin Kryetari Kadri Rahimaj, Drejtori i Arsimit, Afrim Dervishi dhe zyrtarë nga kjo drejtori.
Kryetari Rahimaj uroi të gjithë stafin për këtë përvjetor duke thënë se kontributi i tyre në edukimin e fëmijëve nuk mund të shpërblehet me asgjë, dhe vetëm sukseset e fëmijëve janë ato që flasin për punën e të gjithë stafit.
Ndërsa u.d Drejtoresha e IP “Filizat”, Fatime Leci, duke falënderuar Kryetarin dhe Drejtorin për mbështetjen theksoi se ky jubile i rëndësishëm shënon një rrugëtim të gjatë dhe të suksesshëm, ku të gjithë ata që kanë kontribuar në këtë institucion kanë pasur mundësinë të formojnë breza të rinj me vlera, dije dhe dashuri për mësimin.
Ndryshe IP “Filizat” është i vetmi institucion parashkollor në nivel vendi që ofron për fëmijët ushqim të shëndetshëm dhe ka një meny të pasur me ushqime.
Poashtu së fundmi Komuna e Kamenicës për fëmijët e IP “Filizat” ka siguruar kartelat shëndetësore ku do t’ua mbulojë të gjitha shpenzimet në rastet kur ata paraqiten në insitucionet shëndetësore, e gjithë kjo për fëmijë të shëndetshëm dhe të sigurt.
