Fëmijë të buzëqeshur, së bashku me edukatorët e tyre, pritën prindërit dhe mysafirët për të shënuar 45-vjetorin e Institucionit Parashkollor “Filizat”. Të veshur bukur dhe të rreshtuar njëri pas tjetrit, ata festuan për shtëpinë e tyre të dytë, ku hodhën hapat e parë drejt dijes.
Atmosfera festive mbizotëroi në ambientet e institucionit, ku kopshti ishte zbukuruar me balona shumëngjyrëshe, punime kreative të fëmijëve dhe fotografi të gjeneratave të kaluara që rikujtonin rrugëtimin ndër vite. Në çdo cep ndihej gëzimi i festës, ndërsa prindër, mysafirë dhe staf ndanin momente të veçanta krenarie e emocionesh. Pikërisht nga ky kopsht, ndër dekada, kanë marrë hapat e parë drejt dijes disa gjenerata fëmijësh, të cilët sot janë pjesë aktive e shoqërisë sonë.
Në këtë ngjarje festive morën pjesë: U.d së drejtoreshës së IP “Filizat”, Fatime Leci, nënkryetarja e Komuna e Kamenicës, Arta Bajralija, komandanti i policisë Basri Shkodra, komandanti i OVL-UÇK – Dega në Kamenicë, Milaim Limani, drejtorë të drejtorive komunale, prindër dhe mysafirë të tjerë.
Në fjalën e saj, U.d drejtoresha Leci theksoi se 45-vjetori paraqet një moment krenarie dhe mirënjohjeje, për rrugëtimin e institucionit që nga themelimi në vitin 1981 me misionin e edukimit dhe përkujdesjes së fëmijëve. Ajo rikujtoi sfidat historike, ndërprerjen e punës gjatë viteve ’90 dhe rifillimin e aktivitetit pas vitit 1999, kur institucioni u rikthye si IP “Filizat”.
“Ndër dekada institucioni është rritur bashkë me brezat e fëmijëve, duke ofruar mjedis të sigurt, edukim cilësor dhe përkujdesje të vazhdueshme. Me respekt të thellë përkujtojmë dhe vlerësojmë të gjithë drejtuesit ndër vite, të cilët me përkushtim dhe përgjegjësi e kanë drejtuar këtë institucion drejt zhvillimit dhe suksesit. Një meritë e jashtëzakonshme u takon edukatorëve tanë të cilët me durim, profesionalizëm dhe dashuri të pakushtëzuar kanë ndihmuar në formimin e personaliteteve që nesër do të ndërtojnë të ardhmen tonë”, tha ajo.
Në fjalën e saj u theksua edhe përmirësimi i vazhdueshëm i kushteve në institucion, përfshirë renovimin e objektit dhe krijimin e hapësirave moderne për zhvillimin e fëmijëve.
“Shprehim mirënjohje të thellë për Kryetarin Kadri Rahimaj për mbështetjen institucionale, sidomos për sigurimin e ushqimit të shëndetshëm të verifikuar nga nutricionistë, si dhe sigurimin shëndetësor për të gjithë fëmijët. Po ashtu falënderojmë edhe ish-drejtorin e Arsimit, Afrim Dervishi, për mbështetjen profesionale ndër vite”, është shprehur u.d Leci.
Ndërkaq Nënkryetarja Arta Bajralija theksoi përkushtimin e komunës për edukimin e hershëm, duke nënvizuar se në shtator 2023 është realizuar renovimi i plotë i objektit pas dy dekadash.
“Institucioni është pajisur dy herë me lodra të reja me standarde evropiane. Poashtu të gjithë fëmijët gëzojnë sigurim shëndetësor si dhe ushqehen me menu të shëndetshme, të hartuara nga nutricionistë profesionistë, andaj falë përmrësimit të kushteve është rritur interesimi i prindërve”, ka thënë ajo duke shtuar se bazuar në rritjen e numrit të fëmijëve dhe zotimet e Kryetarit Rahimaj, janë ndërtuar dy çerdhe të reja si çerdhja në Koretin në vlerë 741 mijë euro në bashkëpunim me MASHTI-n ku pritet të fillojë së shpejti punën, si dhe çerdhja në Roganë në vlerë 718,600 euro, e cila është në ndërtim e sipër.
Në fund të këtyre falendërimeve u shpërndanë mirënjohje për punëtorët më të vjetër të institucionit në shenjë falënderimi për kontributin dhe përkushtimin e tyre ndër vite.
