Koordinatorja e Njësisë Komunale për të Drejtat e Njeriut (NJKDNJ), njëherësh edhe person kontaktues në projektin “Qeverisja e Hapur Lokale”, znj. Nazmije Demolli Kastrati, mori pjesë në Forumin e tretë të Shkëmbimit mbi Qeverisjen e Hapur Lokale dhe Inovacionet Demokratike, të organizuar nga Këshilli i Evropës.
Ky forum mblodhi së bashku autoritete lokale, përfaqësues të kuvendeve komunale, institucione dhe partnerë të ndryshëm, me qëllim shkëmbimin e përvojave, prezantimin e praktikave më të mira dhe diskutimin e qasjeve inovative për avancimin e qeverisjes së hapur në nivel lokal.
Gjatë forumit, znj. Demolli Kastrati përfaqësoi Komunën e Kamenicës duke prezantuar angazhimet dhe praktikat konkrete të komunës në promovimin e transparencës, llogaridhënies dhe pjesëmarrjes qytetare. Ajo theksoi rëndësinë e përfshirjes së komunitetit në proceset vendimmarrëse, si dhe rolin e institucioneve lokale në ndërtimin e një qeverisjeje më të hapur dhe gjithëpërfshirëse.
“Pjesëmarrja në këtë forum përfaqëson një hap të rëndësishëm drejt forcimit të bashkëpunimit ndërinstitucional dhe avancimit të standardeve demokratike në nivel lokal, duke kontribuar njëkohësisht në rritjen e besimit të qytetarëve ndaj institucioneve publike. Komuna e Kamenicës mbetet e përkushtuar në zbatimin e parimeve të qeverisjes së hapur, si dhe në zhvillimin e mekanizmave që garantojnë transparencë, llogaridhënie dhe përfshirje aktive të qytetarëve në proceset vendimmarrëse,” u shpreh ajo.
Nga Komuna e Kamenicës u ritheksua përkushtimi për të vazhduar me iniciativa që forcojnë transparencën dhe rrisin pjesëmarrjen e qytetarëve në vendimmarrje.
