Mes familjarëve, miqve dhe në një ambient të gjelbëruar, të organizuar me kujdes deri në detajin më të vogël, maturantët e Kamenicës, gjenerata 2023–2026, diplomuan në një ceremoni të hapur dhe festive.
Emocione të papërshkrueshme dhe krenari shoqëruan vajzat dhe djemtë e rinj, të cilët tashmë kanë nisur të projektojnë ëndrrat dhe synimet e tyre për të ardhmen. Ata ishin protagonistët kryesorë të kësaj ceremonie, ku mbyllën një kapitull të rëndësishëm të jetës së tyre për të hapur një tjetër drejt një rruge të re, tashmë të zgjedhur prej tyre.
Në këtë ceremoni morën pjesë Kryetari i Komunës, Kadri Rahimaj, Nënkryetarja Arta Bajralija, Kryesuesja e Kuvendit Komunal Arbnore Beqiraj-Fera, Drejtori i Arsimit Selami Klaiqi, Rektori i Universitetit “Kadri Zeka” në Gjilan Artan Dërmaku, Komandanti i Stacionit Policor në Kamenicë Basri Shkodra, drejtorë komunalë, drejtorë shkollash, profesorë, maturantë, nxënës, familjarë dhe qytetarë të tjerë.
Në fjalën e tij përshëndetëse, Kryetari Kadri Rahimaj tha se kjo ditë është e veçantë për secilin maturant, pasi shënon përmbylljen e një kapitulli të rëndësishëm dhe fillimin e një etape të re plot sfida, ëndrra dhe mundësi.
“Diplomimi nuk është vetëm fundi i një rruge shkollore, por dëshmi e përkushtimit, punës dhe sakrificës që keni bërë ndër vite. Ju sot po largoheni nga bankat shkollore me kujtime të paharrueshme, me miqësi të krijuara përjetë dhe me përvoja që do t’ju shoqërojnë gjatë gjithë jetës. Në këto korridore keni mësuar jo vetëm mësime nga librat, por edhe vlera njerëzore. Shkollat tona kanë nxjerrë ndër vite njerëz të suksesshëm, profesionistë, mjekë, arsimtarë, sportistë, artistë e udhëheqës që sot kontribuojnë për komunën dhe vendin tonë. Besoj fuqishëm se edhe nga gjenerata juaj do të dalin të rinj e të reja që do të jenë zëri i ndryshimit, shembull i suksesit dhe krenari për familjet dhe qytetin tonë”, ka thënë Kryetari Rahimaj.
Ai shtoi se rruga që i pret përpara të rinjtë nuk do të jetë gjithmonë e lehtë, por i inkurajoi ata të besojnë në vetvete dhe të mos heqin dorë nga ëndrrat e tyre.
“Do të ketë sfida, pengesa dhe momente kur do të dyshoni në vetvete. Por mos harroni kurrë se çdo sukses i madh fillon me guximin për të mos u dorëzuar. Ne si komunë do të vazhdojmë të jemi pranë të rinjve, duke mbështetur arsimin, talentin dhe zhvillimin tuaj profesional. Sepse investimi tek rinia është investimi më i rëndësishëm për të ardhmen e komunës sonë”, ka theksuar ai.
Rektori i Universitetit “Kadri Zeka” në Gjilan, Artan Dërmaku, në fjalën e tij tha se kjo ditë nuk është vetëm festë, por një moment që maturantët do ta mbajnë mend gjatë gjithë jetës.
“Ju po largoheni nga bankat e shkollës së mesme me shpresa, me pasiguri, por edhe me një forcë të madhe brenda vetes, forcën e rinisë. Mos lejoni askënd t’ju bindë se vini nga një qytet i vogël dhe se kjo ju pengon të arrini suksese të mëdha. Shpeshherë vendet e vogla krijojnë potencial të madh. Nga ju presim të jenë mjekët, programerët, ndërmarrësit dhe profesionistët e së ardhmes që do t’ia zbardhin fytyrën komunës dhe Kosovës”, ka thënë ai.
Drejtori i Arsimit, Selami Klaiqi, tha se maturantët janë krenaria e qytetit të Kamenicës.
“Kjo ngjarje na tregon se po mbyllim një kapitull të rëndësishëm dhe po hapim një faqe të re. Ju njoh nga afër dhe e di se do të jeni krenaria jo vetëm e qytetit tonë, por edhe e gjithë shqiptarëve. Ne besojmë në guximin dhe potencialin tuaj, sepse vetëm me punë dhe angazhim arrihen sukseset në jetë”, ka deklaruar ai.
Në emër të maturantëve foli edhe Olsa Ademi, e cila falënderoi profesorët dhe prindërit për mbështetjen gjatë gjithë rrugëtimit shkollor.
“Para pak vitesh hymë në këtë shkollë me ëndrra të mëdha dhe pak frikë. Sot po largohemi me kujtime të paharrueshme dhe me bindjen se mund të arrijmë shumë. Profesorët tanë na kanë shtyrë të mos dorëzohemi dhe të luftojmë për ëndrrat tona, ndërsa prindërit kanë qenë mbështetja jonë më e madhe. Sot është fundi i një epoke, por jo fundi i kujtimeve”, ka thënë ajo.
Në kuadër të ceremonisë u ndanë edhe shpërblime për maturantët, përfshirë sete librash nga DKA, trajnime profesionale nga “Cactus Education” në Parkun Teknologjik në Kamenicë, bursa komunale në vlerë prej 400 dhe 600 eurosh, si dhe trajnime në gjuhë programuese dhe 3D printing nga BONEVET Kamenica.
Ceremonia u përmbyll me hedhjen simbolike të kapelave në ajër, mes urimeve dhe emocioneve për sukseset e ardhshme të maturantëve.
