Komuna e Kamenicës në bashkëpunim me UN-Habitat Kosova dhe me mbështetjen e Friedrich Ebert Stiftung (FES), mbajti punëtorinë e parë për hartimin e Planit të Mobilitetit të Qëndrueshëm Urban (PMQU), një proces i rëndësishëm që synon përmirësimin e lëvizshmërisë, sigurisë dhe cilësisë së jetës për qytetarët e Kamenicës.
Punëtoria u hap nga Kryesuesi i Komisionit për hartimin e Planit të Mobilitetit të qëbdrueshëm urban të Kamenicës, Besim Morina, i cili prezantoi iniciativën dhe procesin e hartimit të PMQU-së në Komunën e Kamenicës. Në këtë aktivitet morën pjesë përfaqësues të UN-Habitat Kosova, Friedrich Ebert Stiftung (FES), Ministrisë së Mjedisit, Planifikimit Hapësinor dhe Infrastrukturës (MMPHI), drejtorë të drejtorive komunale, zyrtarë komunalë, Komandanti i Stacionit Policor në Kamenicë, Basri Shkodra, si dhe palë të tjera të interesit.
Gjatë sesionit të parë u prezantua pilot-projekti i transportit publik i financuar nga FES, ndërsa përfaqësuesit e Komunës së Vushtrrisë ndanë përvojat e tyre lidhur me procesin e hartimit të Planit të Mobilitetit të Qëndrueshëm Urban. Po ashtu, u prezantuan të dhënat fillestare mbi gjendjen e lëvizshmërisë në Kamenicë, të përgatitura nga ekspertët e UN-Habitat.
Në sesionin e dytë të punëtorisë, pjesëmarrësit diskutuan sfidat kryesore të lëvizshmërisë në zonat urbane të komunës, identifikuan prioritetet dhe mundësitë për zhvillimin e lëvizshmërisë së qëndrueshme, si dhe propozuan masa konkrete për tejkalimin e problemeve dhe përmirësimin e qasjes në transport, sigurisë rrugore dhe lëvizjes aktive.
Hartimi i Planit të Mobilitetit të Qëndrueshëm Urban do të shërbejë si një dokument strategjik për zhvillimin e një sistemi modern, të sigurt dhe gjithëpërfshirës të transportit në Komunën e Kamenicës, duke kontribuar në krijimin e një mjedisi më të gjelbër dhe më të përshtatshëm për të gjithë qytetarët.
