Organizata Joqeveritare Dardanapress ka nënshkruar një Marrëveshje Mirëkuptimi me Drejtorinë për Zhvillim Ekonomik dhe Diasporë në Komunën e Kamenicës, në kuadër të projektit “Promovimi i politikave të zhvillimit – Socio Ekonomik në Komunën e Kamenicës”.
Marrëveshja u nënshkrua nga Drejtori Ekzekutiv i Dardanapress dhe njëherësh menaxher i projektit, Sherafedin Vranja, dhe drejtori i Drejtorisë për Zhvillim Ekonomik dhe Diasporë, Edon Dërmaku. Ky bashkëpunim synon të forcojë koordinimin ndërmjet institucioneve lokale dhe shoqërisë civile për realizimin e aktiviteteve që kontribuojnë në zhvillimin e qëndrueshëm të komunës.
Gjatë takimit, menaxheri i projektit prezantoi qëllimet, objektivat dhe aktivitetet që do të zhvillohen gjatë periudhës së implementimit. Projekti synon promovimin e politikave zhvillimore, rritjen e pjesëmarrjes qytetare në proceset vendimmarrëse, fuqizimin e bashkëpunimit ndërmjet institucioneve dhe komunitetit, si dhe identifikimin e nevojave prioritare që ndikojnë në mirëqenien ekonomike dhe sociale të qytetarëve të Kamenicës.
Drejtori i Drejtorisë për Zhvillim Ekonomik dhe Diasporë, Edon Dërmaku, shprehu gatishmërinë e institucionit për të përmbushur obligimet e dala nga kjo marrëveshje, duke vlerësuar rëndësinë e partneritetit me organizatat e shoqërisë civile në avancimin e politikave lokale të zhvillimit.
Projekti “Promovimi i politikave të zhvillimit – Socio Ekonomik në Komunën e Kamenicës” mbështetet dhe financohet nga Ministria e Zhvillimit Rajonal dhe pritet të sjellë iniciativa konkrete që kontribuojnë në zhvillimin ekonomik dhe social të komunës.
