Në kuadër të manifestimeve për shënimin e 18 Qershorit – Ditës së Çlirimit të Kamenicës, Kuvendi Komunal mbajti sot seancë solemne, në të cilën morën pjesë Kryesuesja e Kuvendit Komunal Arbnore Beqiraj-Fera, Kryetari i Komunës Kadri Rahimaj, Nënkryetarja e Komunës Arta Bajralija, Kryetari i OVL-UÇK-së – dega në Kamenicë Milaim Limoni, Kryetari i Bashkësisë Islame Ferid Dërmaku, përfaqësuesuesi i FSK-së Major Gëzim Osmani, asamblistë të Kuvendit Komunal, veteranë të luftës, familjarë të dëshmorëve, qytetarë dhe mysafirë të ftuar.
Seancën e hapi Kryesuesja e Kuvendit Komunal, Arbnore Beqiraj-Fera, e cila theksoi rëndësinë historike të kësaj date dhe rëndësinë e ruajtjes së kujtesës për sakrificën e atyre që e bënë të mundur lirinë.
“Sot, me krenari dhe mirënjohje të thellë, shënojmë Ditën e Çlirimit të Kamenicës, ditën kur liria triumfoi mbi sakrificën dhe shpresa mbi vuajtjen. Mënyra më e mirë për t’i nderuar ata që dhanë jetën për lirinë është të punojmë çdo ditë për zhvillimin e komunës sonë, për mirëqenien e qytetarëve dhe për një të ardhme më të mirë për fëmijët tanë. Le të mbetet kjo ditë simbol i unitetit, respektit dhe përgjegjësisë sonë për ta ruajtur e forcuar lirinë që e fituam me shumë sakrificë”, ka thënë Kryesuesja Beqiraj-Fera.
Në fjalën e tij, Kryetari i Komunës, Kadri Rahimaj, tha se 18 Qershori është një ditë që rikujton sakrificën, idealin dhe përkushtimin e të gjithë atyre që kontribuuan për lirinë e vendit, duke theksuar se mirënjohja ndaj tyre shndërrohet në vepra konkrete për zhvillimin e komunës.
Ai theksoi se liria nuk nënkupton vetëm mungesën e luftës, por edhe ndërtimin e një shoqërie ku qytetarët jetojnë me dinjitet dhe perspektivë.
Në emër të Organizatës së Veteranëve të Luftës së UÇK-së – Dega në Kamenicë, komandanti Milaim Limoni theksoi rëndësinë historike të 18 Qershorit, duke kujtuar sakrificën e dëshmorëve dhe kontributin e luftëtarëve të lirisë.
“Sot jemi mbledhur në këtë seancë solemne për të shënuar një nga datat më të rëndësishme në historinë e komunës sonë – Ditën e Çlirimit të Kamenicës. Kjo është një ditë krenarie, respekti dhe mirënjohjeje për të gjithë ata që sakrifikuan për lirinë që gëzojmë sot. Çlirimi i Kamenicës nuk ishte vetëm fundi i një periudhe të errët shtypjeje dhe padrejtësie, por ishte fillimi i një epoke të re, e ndërtuar mbi idealet e lirisë, dinjitetit dhe të drejtës për të jetuar të lirë në vendin tonë,” u shpreh Limoni.
Ai shtoi se nderimi më i madh për dëshmorët dhe të rënët është puna e përditshme për zhvillimin e vendit dhe forcimin e institucioneve demokratike.
Seanca solemne u përmbyll me mesazhin se liria e fituar me sakrificë duhet të ruhet dhe të forcohet çdo ditë përmes angazhimit të përbashkët për zhvillimin e Kamenicës, mirëqenien e qytetarëve dhe ndërtimin e një të ardhmeje më të mirë për brezat që vijnë.
