Kryetari i Komunës së Kamenicës,Kadri Rahimaj, së bashku me stafin e tij, priti në takim zëvendësministrin e parë të Ministrisë së Zhvillimit Rajonal (MZHR), Ali Dula, me të cilin diskutoi për bashkëpunimin ndërinstitucional dhe avancimin e projekteve kapitale që po realizohen në komunën tonë.
Gjatë takimit u shkëmbyen biseda dhe diskutime për rëndësinë e bashkëpunimit ndërmjet nivelit qendror dhe atij lokal, koordinimin institucional dhe mbështetjen për realizimin e projekteve që ndikojnë drejtpërdrejt në përmirësimin e jetës së qytetarëve të Kamenicës.
Kryetari Rahimaj vlerësoi bashkëpunimin me Ministrinë e Zhvillimit Rajonal, duke theksuar rëndësinë e mbështetjes institucionale për realizimin e projekteve që u përgjigjen nevojave të qytetarëve dhe kontribuojnë në zhvillimin e qëndrueshëm të komunës.
Pas takimit, përfaqësuesit institucionalë vizituan nga afër dy projekte kapitale që po realizohen në bashkëpunim ndërmjet Ministrisë së Zhvillimit Rajonal dhe Komunës së Kamenicës: “Parku i Aventurave” dhe “Parku Teknologjik”.
Gjatë vizitës, u panë nga afër punimet në Parkun e Aventurave si dhe hapësirat moderne të Parkut Teknologjik i cili tashmë për dy vite radhazi vazhdon me përgaditjen e të rinjve dhe trajnimin e tyre në fushën e IT-së.
Zëvendësministri i parë, Ali Dula, përgëzoi Kryetarin Rahimaj për punët e mira që po realizon në Kamenicë e po ashtu rikonfirmoi përkushtimin e Ministrisë së Zhvillimit Rajonal për vazhdimin e bashkëpunimit.
