Në kuadër të fushatës për ndërgjegjësimin për kancerin e gjirit, e cila shënohet gjatë muajit tetor, drejtori i Drejtorisë për Shëndetësi dhe Mirëqenie Sociale, Besart Kryeziu, së bashku me stafin e tij, kanë vizituar Qendrën Kryesore të Mjekësisë Familjare (QKMF) në Kamenicë, përkatësisht hapësirat ku është i vendosur mamografi.
Gjatë vizitës, drejtori dhe stafi janë njoftuar nga afër me punën e mamografit, kontrollet që po realizohen dhe çështje të tjera që lidhen me ofrimin e këtij shërbimi shëndetësor.
Drejtori Besart Kryeziu u ka bërë thirrje të gjithë qytetarëve që të kujdesen për shëndetin e tyre dhe të kryejnë kontrollet e nevojshme, duke theksuar se mamografi është në dispozicion nga ora 09:00 deri në orën 14:00. Ai gjithashtu ka vënë në pah rëndësinë e muajit tetor për rritjen e ndërgjegjësimit dhe mbështetjen e personave të prekur nga kanceri i gjirit.
“Kontrollet e rregullta janë thelbësore për zbulimin e hershëm të kancerit të gjirit dhe për mbrojtjen e shëndetit. Ftoj të gjitha gratë që të përfitojnë nga shërbimi i mamografisë, i cili është në dispozicion në QKMF në Kamenicë, nga ora 09:00 deri në 14:00 çdo ditë pune. Kujdesi për shëndetin duhet të jetë prioritet i secilës prej nesh, sepse zbulimi i hershëm shpëton jetë”, ka thënë drejtori Besart Kryeziu.
Ndërkaq Infermjerja Bsc.Sherife Berisha ka bërë të ditur se gjatë këtij viti janë realizuar 120 mamografi, ndërsa në tri raste është zbuluar kanceri i gjirit. Sipas saj, vetëdijesimi i qytetarëve është dukshëm më i madh krahasuar me vitet e kaluara, ndërsa moshat e personave që kanë kryer mamografi variojnë nga 37 deri në 80 vjeç.
Komuna e Kamenicës u bën thirrje të gjithë qytetarëve që të mos i neglizhojnë kontrollet dhe të kujdesen për shëndetin e tyre.
Kontrollohu, për veten, për jetën!
