Me rastin e 25-vjetorit të rënies heroike të dëshmorit të kombit, Rahim Beqiri – Komandant Roki, sot u zhvilluan homazhe në Varrezat e Dëshmorëve në Kamenicë, në nderim të jetës, veprës dhe sakrificës së tij për lirinë e vendit.
Në kuadër të aktiviteteve përkujtimore, u bë edhe vendosja e luleve pranë lapidarit të Komandant Rokit në Kopernicë, vendlindjen e tij, duke përkujtuar me respekt të thellë figurën dhe kontributin e dëshmorit.
Në këto aktivitete morën pjesë Kryetari i Komunës së Kamenicës, Kadri Rahimaj, së bashku me Nënkryetaren Arta Bajralija, Shefin e Kabinetit Vaxhid Rexhepaj dhe Kryesuesen e Kuvendit Komunal, Arbnore Beqiraj-Fera.
Me këtë rast, përfaqësuesit e Komunës u mirëpritën nga familjarët e dëshmorit, djemtë e tij, si dhe bashkëluftëtarët nga Maqedonia e Veriut duke ndarë me ta kujtimin dhe nderimin për figurën e Komandant Rokit.
“Sakrifica e Rahim Beqirit mbetet dëshmi e përkushtimit ndaj atdheut dhe lirisë, ndërsa kujtimi për të dhe për të gjithë dëshmorët e kombit do të ruhet ndër breza”, tha në një fjalë rasti Kryetari Rahimaj.
Pas përfundimit të këtyre aktiviteteve, familjarë, bashkëluftëtarë e qytetarë të shumtë vazhduan për në ecjen përkujtimore të organizuar për Komandant Rokin.
Lavdi e përjetshme dëshmorit Rahim Beqiri – Komandant Roki!
Lavdi të gjithë dëshmorëve të kombit!
