Kryetari i Komunës së Kamenicës, Kadri Rahimaj, së bashku me Nënkryetaren Arta Bajralija, Drejtorin e Arsimit Selami Klaiqi, Drejtorin e Bujqësisë Shpend Morina dhe konsulentin Albert Selishta, kanë pritur në takim Drejtorin Ekzekutiv të Organizatës “TIKA”, Mehmed Taha Dogan, së bashku me zëvendëskoordinatorin e kësaj organizate.
Gjatë takimit është diskutuar për mundësitë e bashkëpunimit ndërmjet Komunës së Kamenicës dhe Organizatës “TIKA”, me fokus në fusha të rëndësishme si arsimi, shëndetësia, bujqësia, blegtoria, bletaria, aftësimi profesional dhe fusha të tjera me interes për qytetarët.
Kryetari Kadri Rahimaj ka falënderuar Drejtorin Dogan dhe stafin e tij për vizitën, duke theksuar nevojën për mbështetjen e organizatave dhe donatorëve në realizimin e projekteve që synojnë përmirësimin e shërbimeve dhe krijimin e mundësive të reja për qytetarët.
“Ju falënderoj për kohën tuaj dhe ju uroj pozitën në krye të organizatës ‘TIKA’. Më vjen mirë që kemi mundësinë që t’ju paraqesim disa nga karakteristikat e komunës sonë. Edhe komuna jonë, sikurse komunat tjera, ballafaqohet me sfida të ndryshme ku më e rëndësishmja është sfida e buxhetit. Andaj edhe projektet e destinuara në të mirë të qytetarëve tanë për këtë arsye disa mbesin pa u realizuar ose mbesin në gjysmë. Ne kemi nevojë për mbështetje të donatorëve apo edhe organizatave siç është ‘TIKA’, për të na mbështetur në këto projekte”, ka thënë Kryetari Rahimaj.
I pari i komunës ka veçuar disa nga fushat në të cilat Kamenica ka nevojë për mbështetje, duke vënë theks të veçantë në bujqësi, arsimin profesional dhe transportin publik.
“Ne si komunë kemi të zhvilluar mjaft mirë fushën e bujqësisë, ku në sektorin e blegtorisë prodhohen rreth 2 milionë litra qumësht në vit dhe synojmë ta rrisim këtë sasi duke menduar që në të ardhmen të kemi edhe produktin ‘Djathi i Kamenicës’ të patentuar dhe ta eksportojmë. Po ashtu në komunën tonë kemi rreth 200 bletarë të cilët merren me kultivimin e mjaltit. Në fushën e industrisë kemi biznese që merren me prodhimin e dyerve dhe dritareve. Mirëpo, lidhur me këtë kemi sfida në fushën e arsimit, sepse nuk po arrijmë të prodhojmë kuadro për sektorët industrialë, pasi shkollat profesionale nuk janë të pajisura me makineri për këta sektorë”, ka theksuar Kryetari Rahimaj duke folur edhe për mungesën e transportit publik.
“Ndërsa njëra nga sfidat më të rëndësishme është ajo e transportit publik. Së fundmi në planin e fizibilitetit që kemi bërë rezultatet tregojnë se komuna jonë e ka të domosdoshëm transportin publik. Madje edhe në takimet me qytetarë që kam zhvilluar këtë shqetësim e shprehin të gjithë. Ne kemi parë disa mundësi për blerjen e autobusëve, por është një kosto tejet e lartë dhe këtu duhet që përmes donatorëve të bëjmë ndonjë marrëveshje. Urojmë që ta arrijmë këtë”, shtoi Kryetari Rahimaj.
Nga ana tjetër, Drejtori Ekzekutiv i Organizatës “TIKA”, Mehmed Taha Dogan, ka falënderuar Kryetarin Rahimaj për mikpritjen duke vlerësuar ekipin komunal dhe gatishmërinë për bashkëpunim.
“Ju falënderoj së pari për mikpritjen me stafin tuaj. Organizata jonë ‘TIKA’ ka zyrë në 61 vende nëpër botë, por deri më tani në 170 shtete kemi realizuar projekte. Unë i dëgjova me vëmendje ato që thatë ju dhe madje edhe sfidat. Ajo që mund t’ju ofrojmë si organizatë janë trajnime të ndryshme në aftësim profesional, si për të rinj, ashtu edhe për gra. Mund t’i mbështesim gratë me trajnime në fushat e gastronomisë, tekstilit, bujqësisë apo edhe punëdore”, është shprehur ai duke ofruar zgjidhje edhe për sfidat në shkollat profesionale.
“Po ashtu lidhur me mungesën e mjeteve në shkollat profesionale, edhe aty mund t’ju ndihmojmë për krijimin e atelieve me mjete, ndërsa mund të ofrojmë edhe trajnime për prodhuesit e dyerve, dritareve apo edhe mobileve. Ndërsa në fushën e bujqësisë mund të ofrojmë serra, por edhe trajnime teknike apo materiale për blegtorët. Ne mund të ofrojmë trajnime dhe projekte edhe për shëndetësinë apo zjarrfikësit, si ta shihni ju të arsyeshme. Në përgjithësi duam që sa më parë të lidhim bashkëpunim me Komunën e Kamenicës dhe presim nga ju të na vijnë kërkesat për projektet ku ju keni nevojë më së shumti”, ka thënë Drejtori Dogan.
Në fund të takimit, Kryetari Rahimaj dhe Drejtori Ekzekutiv i “TIKA”-s, Mehmed Taha Dogan, u dakorduan që në periudhën në vijim të fillojnë shkëmbimin e formularëve dhe kërkesave për projektet prioritare me qëllim konkretizimin e bashkëpunimit dhe fillimin e realizimit të projekteve në fusha me interes për Komunën e Kamenicës dhe qytetarët e saj.
