Kryetari i Komunës së Kamenicës, Kadri Rahimaj, po merr pjesë në Konferencën e Biomasës së Europës Qendrore (CEBC 2026), e cila po mbahet në Graz të Austrisë. Ai po përfaqëson komunën së bashku me anëtarët e ekipit, Uran Berisha dhe Shpend Morina, në këtë ngjarje dyditore që konsiderohet ndër më të rëndësishmet në Evropën Qendrore në fushën e biomasës.
Sipas Kryetarit Rahimaj, pjesëmarrja në këtë konferencë i ofron Kamenicës një mundësi të rëndësishme për të parë mundësitë e investimit në sektorin e biomasës, bashkëpunime potenciale me partnerët evropianë, si dhe për të shfaqur progresin e bërë përmes projektit SUNREED, në të cilin ka qenë e përfshirë edhe Komuna e Kamenicës.
Konferenca CEBC 2026, e cila në fokus të sesioneve të saj ka edhe Kosovën, shërben si platformë për diskutimin e politikave të përmirësuara, investimeve dhe teknologjive moderne që synojnë rritjen e përdorimit të qëndrueshëm të biomasës.
Delegacioni nga Kosova po merr pjesë në këtë konferencë me propozim të organizatës CNVP, e cila implementon projektin SUNREED. Në këtë kuadër, Komuna e Kamenicës e ka parë pjesëmarrjen si një platformë për të shkëmbyer praktikat më të mira, për të forcuar bashkëpunimin rajonal dhe për të avancuar dialogun e politikave mbi standardet dhe zhvillimin e projekteve që në thelb kanë përdorimin e biomasës.
Kryetari Rahimaj bëri të ditur se Komuna e Kamenicës tashmë ka të përfunduar edhe studimin e fizibilitetit për ngrohtoren e qytetit. Ai theksoi se së bashku me anëtarët e ekipës së tij po kthehet nga kjo konferencë me ide të reja për investime dhe bashkëpunime që synojnë progres dhe zhvillim për Komunën e Kamenicës.
