Me aktivitetet e para të mbajtura më 15 qershor, ka nisur manifestimi tradicional “Qershori i Lirisë 2026”, i organizuar nga Drejtoria për Kulturë, Rini dhe Sport e Komunës së Kamenicës, në nderim të 18 Qershorit – Ditës së Çlirimit të Kamenicës.
Në kuadër të agjendës së ditës së parë, në Shtëpinë e Kulturës “Isa Kastrati” u vendos portreti i dëshmorit Isa Kastrati, emrin e të cilit e mban ky institucion kulturor. Ky aktivitet u realizua me qëllim të përjetësimit të kujtimit dhe shprehjes së mirënjohjes për sakrificën e dëshmorit për lirinë e vendit.
Drejtori i Drejtorisë për Kulturë, Rini dhe Sport, Afrim Dervishi, tha se vendosja e portretit është një akt simbolik që ruan dhe përcjell vlerat e luftës çlirimtare te brezat e rinj.
“Në emër të Kryetarit të Komunës, Kadri Rahimaj, falënderoj piktorin Fetah Tali Shehu për realizimin profesional të kësaj vepre dhe për dhurimin e saj për institucionin tonë”, u shpreh Dervishi.
Po ashtu, në kuadër të manifestimit u hap edhe ekspozita me fotografi të dëshmorëve të Komunës së Kamenicës, duke sjellë para qytetarëve kujtime dhe dëshmi të sakrificës së atyre që dhanë jetën për lirinë e vendit.
Me këtë rast, drejtori Dervishi theksoi se arti dhe kultura lulëzojnë në liri, ndërsa portretet e dëshmorëve e shndërrojnë Shtëpinë e Kulturës në një monument të gjallë të memories kolektive, ku historia dhe kultura bashkëjetojnë në çdo aktivitet.
“Lavdi dëshmorëve!”, përfundoi ai.
Manifestimi “Qershori i Lirisë 2026” do të vazhdojë edhe në ditët në vijim me aktivitete të shumta kulturore, artistike dhe përkujtimore kushtuar Ditës së Çlirimit të Kamenicës
