Në fshatin Dajkoc ka nisur korrja e grurit të mbjellë në një sipërfaqe prej 3 hektarësh tokë komunale, një projekt që synon të sigurojë miell për nevojat e Kuzhinës Popullore të Komunës së Kamenicës.
Kryetari i Komunës, Kadri Rahimaj, së bashku me drejtorin e Drejtorisë së Bujqësisë, Shpend Morina, ndoqën nga afër procesin e korrjes dhe theksuan rëndësinë e shfrytëzimit të pronës komunale në interes të qytetarëve.
“Nga toka jonë për fëmijët tanë. Ky është qëllimi i këtij projekti – që toka komunale të prodhojë ushqim për ata që kanë më së shumti nevojë,” u shpreh kryetari Rahimaj.
Ai shtoi se mielli i përfituar nga kjo parcelë do të përdoret si lëndë e parë për Kuzhinën Popullore, duke kontribuar drejtpërdrejt në përgatitjen e ushqimit për fëmijët e komunës.
“Ky projekt dëshmon se toka komunale mund të shfrytëzohet me përgjegjësi dhe të vihet në funksion të interesit publik. Është një cikël i plotë, ku toka mbillet, prodhimi përpunohet dhe përfitimi kthehet tek fëmijët tanë,” tha Rahimaj.
Komuna e Kamenicës mbetet e përkushtuar në zhvillimin e projekteve që mbështesin bujqësinë, shfrytëzimin efikas të pronës publike dhe mirëqenien e qytetarëve.
